News Update :

Sunday, July 2, 2017

TamilLetter

வென்றெடுப்பதற்காக களத்தில் கருணா

வென்றெடுப்பதற்காக களத்தில் கருணா
கிழக்கு மாகாண சபைத் தேர்தலில் களமிறங்கவுள்ள தமது கட்சி, தமிழ் முதலமைச்சர் ஒருவரை வென்றெடுப்பதற்காக எந்தவொரு விட்டுக்கொடுப்பையும் செய்வதற்குத் தயாராகவே இருப்பதாக கருணா தெரிவித்துள்ளார்.
கிழக்கு மாகாண சபையின் ஆயுட்காலம் எதிர்வரும் செப்டெம்பர் 25ம் திகதியுடன் நிறைவுக்கு வருகின்றது.
அதன்பின்னர் மாகாண சபைத் தேர்தலை நடத்துவதற்கு அரசு உத்தேசித்துள்ளது. இதற்கான அறிவிப்பு ஒக்டோபர் முதல் வாரத்தில் விடுக்கப்படவுள்ளது.
இந்த நிலையில், ஆட்சி மாற்றத்தின் பின்னர் ஸ்ரீலங்கா சுதந்திரக் கட்சியிலிருந்து வெளியேறி புதிய கட்சி ஒன்றை ஆரம்பித்துள்ள முன்னாள் பிரதி அமைச்சர் கருணா கிழக்கு மாகாண சபைத் தேர்தலை இலக்கு வைத்து காய்நகர்த்தல்களை முன்னெடுத்து வருகின்றார்.
தேர்தல் ஏற்பாடுகள் பற்றி விபரிக்கையிலேயே அவர் மேற்படி தகவலை வெளியிட்டுள்ளார். அவர் மேலும் தெரிவிக்கையில்,
கிழக்கு மாகாண சபைத் தேர்தலில் எமது கட்சி நிச்சயம் களமிறங்கும். எனினும், அதற்கப்பால் எமக்கு தமிழ் முதலமைச்சர் என்ற எண்ணம் கிழக்கிலும் நிறைவேற வேண்டும். சகல தமிழ்க் கட்சிகளும் இணைந்து போட்டியிட்டால் இது நிச்சயம் சாத்தியமாகும்.
ஆகவே, தமிழ் முதலமைச்சர் ஒருவரைப் பெறுவதற்காக எந்தவொரு விட்டுக்கொடுப்பையும் செய்வதற்கு எமது தரப்பு தயாராகவே இருக்கின்றது. இது விடயம் சம்பந்தமாக சகல தமிழ்க் கட்சிகளுடனும் பேச்சு நடத்தப்படும்.
தமிழ்த் தேசியக் கூட்டமைப்பின் தலைவர் இரா. சம்பந்தன் ஐயா, இலங்கைத் தமிழரசுக் கட்சியின் தலைவர் மாவை சேனாதிராஜா அண்ணன் ஆகியோரை விரைவில் சந்திக்க உத்தேசித்துள்ளோம். அதன் பின்னர் ஏனைய தரப்புகளுடனும் பேச்சு நடத்தப்படும் எனவும் கருணா கூறியுள்ளார்.

TamilLetter

About TamilLetter -

முக்கிய குறிப்பு: தமிழ்லெட்டர் நியூஸ் இணைய தளத்துக்கு அனுப்பி வைக்கப்படும் செய்திகள் அனைத்துக்கும் அனுப்பி வைப்பவர்களே பொறுப்பாளிகள் ஆவர். தவறான அல்லது பிறர் மனதை புண் படுத்தும் செய்திகளுக்கு தமிழ்லெட்டர் நியூஸ் பொறுப்பல்ல.
நிருவாகம்-